Enkontru entre Ministériu Turismu Komérsiu Indústria ho parseiru implementadores ba setor Komérsiu, Indústria no Turizmu hodi ko’alia kona-ba servisu ne’ebé parte rua implementa ona nomós atu hemetin nafatin kooperasaun iha futuru. Enkontru refere realiza iha tersa-feira, loron 1 fulan marsu tinan 2022, ne’ebé partisipa husi Ministru MCAE Eng. Joaquim Amaral, Vise-Ministru Komérsiu no Indústria, Domingos Lopes Antunes, no parseirus husi embaixada sira, Organizasaun Mundial, Diretores MTCI no aseosor sira husi MTCI hodi ko’alia kona-ba oinsá mak bele identifika fallansus no lakunas servisu nian ne’ebé realiza ona, no bele hadi’a hamutuk hodi koopera malu iha servisu ne’ebé planeia hodi kontinua la’o ba oin.
Ministru Turizmu Komérsiu no Indústria Dr. José Lucas do Carmo da Silva hateten katak, enkontru ne’e nu’udar meius komunikasaun di’ak ida hodi ko’alia ho parseiru sira, hodi servisu hamutuk ho programa foun ruma ministériu nian. Ministru MTCI afirma mós katak enkontru ne’e nu’udar meius ka mekanizmu hodi loke espasu ho parseiru sira atu bele servisu hamutuk tuir sira-nia interese ba programa ida ne’ebé de’it.
Vise Ministru Komérsiu no Indústria, Domingos Lopes Antunes hanesan keynotes speaker ba panorama programa rekuperasaun ekonomika no asistensia teknika MTCI nian ba parseiro desenvolvimentu sira.
Enkontru ne’e partisipa husi Ministru MCAE Eng. Joaquim Amaral no parseiru hanesan Embaixada sira, Organizasaun Mundial, Diretores MTCI no Aseosores husi MTCI.
–
#Mídia MTCI
