𝐕𝐢𝐬𝐞-𝐏𝐌 𝐥𝐢𝐝𝐞𝐫𝐚 𝐑𝐞𝐮𝐧𝐢𝐚𝐮𝐧 𝐈𝐧𝐭𝐞𝐫𝐦𝐢𝐧𝐢𝐬𝐭𝐞𝐫𝐢á𝐥 𝐛𝐚 𝐤𝐨𝐨𝐫𝐝𝐞𝐧𝐚𝐬𝐚𝐮𝐧 𝐚𝐬𝐮𝐧𝐭𝐮 𝐞𝐤𝐨𝐧ó𝐦𝐢𝐤𝐮 𝐤𝐨𝐧𝐚-𝐛á 𝐟𝐢𝐧𝐚𝐥𝐢𝐳𝐚𝐬𝐚𝐮𝐧 𝐏𝐥𝐚𝐧𝐮 𝐌é𝐝𝐢𝐮 𝐏𝐫𝐚𝐳𝐮 𝟐𝟎𝟐𝟕–𝟐𝟎𝟑𝟎

Vise-Primeiru Ministru, Ministru Koordenadór ba Asuntu Ekonómiku no Ministru Turizmu no Ambiente, Sr. Francisco Kalbuadi Lay, lidera Reuniaun Interministeriál bá koordenasaun asuntu ekonómiku kona-bá finalizasaun Planu Médiu Prazu (PMP) 2027–2030, ne’ebé hala’o iha Centro de Convenções de Díli, Tersa, 14 Jullu 2026.

Enkontru ne’e reprezentante husi ministériu no instituisaun relevante sira atu halo revizaun ikus ba dokumentu importante ne’ebé sei sai hanesan orientasaun ba implementasaun prioridade dezenvolvimentu ekonómiku no sosiál Timor-Leste iha tinan-haat oin mai.

Planu Médiu Prazu 2027–2030 tenke tau a’as nesesidade no interese povu nian, ho objetivu atu hametin kreximentu ekonómiku inkluzivu, habelar oportunidade empregu, aumenta produtividade, no promove dezenvolvimentu sustentável iha setór importante sira.
Diskusaun ne’e mós fó oportunidade ba ministériu hotu-hotu atu harmoniza prioridade sira, hametin koordenasaun interministeriál, no asegura katak programa no projetu governu nian bele implementa ho efisiénsia, transparénsia no responsabilidade.

“𝐏𝐌𝐏 𝟐𝟎𝟐𝟕–𝟐𝟎𝟑𝟎 𝐭𝐞𝐧𝐤𝐞 𝐡𝐚𝐫𝐢𝐢 𝐟𝐮𝐧𝐝𝐚𝐬𝐚𝐮𝐧 𝐛𝐚 𝐞𝐤𝐨𝐧𝐨𝐦𝐢𝐚 𝐩𝐫𝐨𝐝𝐮𝐭𝐢𝐯𝐚, 𝐢𝐧𝐤𝐥𝐮𝐳𝐢𝐯𝐮 𝐧𝐨 𝐬𝐮𝐬𝐭𝐞𝐧𝐭á𝐯𝐞𝐥”
Vise-Primeiru-Ministru, Ministru Koordenadór ba Asuntu Ekonómiku no Ministru Turizmu no Ambiente, Sr. Francisco Kalbuadi Lay, iha nia intervensaun subliña katak Timor-Leste agora tama ona iha momentu importante atu halo mudansa estratéjika ba modelu dezenvolvimentu ekonomia nasionál.

“Agora tempu atu halo mudansa estratéjika husi ekonomia ida ne’ebé depende ba rekursu naturál ba ekonomia ida ne’ebé depende ba produtividade, inovasaun, empreendedorizmu no kapasidade povu Timor-Leste rasik nian,” Vise-PM afirma. Tuir Vise-PM, Planu Médiu Prazu (PMP) 2027–2030 tenke haree hanesan faze importante atu harii fundasaun sólida ba dezenvolvimentu nasionál. Planu ne’e la’ós atu buka de’it númeru kreximentu ne’ebé aas iha tempu badak, maibé reprezenta kompromisu Governu nian atu rezolve obstakulu estruturál sira ne’ebé sei limita dezenvolvimentu ekonomia nasionál.

“PMP 2027–2030 mak kompromisu Governu atu rezolve obstakulu estruturál, hametin instituisaun, hadi’a ambiente regulatóriu, dezenvolve infraestrutura no kapitál umanu, no prepara kondisaun sira atu ekonomia nasionál bele tama iha faze kreximentu ne’ebé lalais, inkluzivu no sustentável iha tinan sira tuirmai,”Vise-PM hateten. Vise-PM mós haktuir katak, transformasaun ekonomia nasionál presiza lideransa forte, korajen polítiku no koordenasaun ne’ebé metin entre ministériu no instituisaun governamentál hotu.

Iha reuniaun interministeriál ne’e hetan mós akompañamentu husi Primeiru-Ministru, Kay Rala Xanana Gusmão.